Nangrugi ti Philippine Army iti Combined Arms Training Exercise (CATEX) 2026 idi Pebrero 23, 2026 idiay Paredes Air Station. Daytoy a pagsasanay ket paset ti panangpapigsa iti panagkaykaysa ken panagkoordinar dagiti operasyon tapno mapagtalkan ti depensa ti pagilian. Inpatungpal daytoy idiay Pasuquin, Ilocos Norte.
Ti CATEX 2026, a maawagan met a “KATIHAN,” ket mangted kadagiti soldado iti gundaway a mangpraktis kadagiti kasla pudno a military operations iti natalged ken nakontrol a lugar. Kabilang ditoy ti panagmaneobra ti tropa, logistics, command and control, intelligence, ken humanitarian missions. Babaen daytoy a pagsasanay, mapagtalkan a nakasagana, nalaing, ken epektibo dagiti soldado iti aniaman a misyon.
Ti pananglukat ti aktibidad ket indauloan ni Rhenante M Salvador. Iti mensahena, impaganetgetna ti kinapateg ti panagkaykaysa, disiplina, ken propesyonalismo iti panangsalaknib ti soberania ti Pilipinas ken panangprotektar kadagiti umili. Kinunana a ti integrated operations ket nasken tapno mapapigsa ti kakayahan ti militar.
Sigun iti Philippine Army, daytoy a pagsasanay ket maaramid iti nakontrol a lugar tapno masigurado ti kinatalged ti publiko ken ti komunidad. Daytoy ket paset ti agtultuloy a panagpaay ti Army iti nasaysayaat a serbisyo, tapno agbalin a mas responsive ken mission-ready a pwersa para iti nasyonal a seguridad ken kinatalged ti amin a Pilipino.
Source: 503rd Infantry “Peace & Justice” Brigade
