Inideklarar ti Provincial Government ti Ifugao nga adda iti State of Stable Internal Peace and Security (SSIPS) ti probinsia idi Pebrero 2, 2026, iti flag raising ceremony nga inaramid iti Provincial Capitol iti Lagawe. Indauluan ti seremonia ni Governor Jerry Uyami Dalipog, a nangibaga a daytoy ket maysa a dakkel nga addang iti natalna ken agtultuloy a panagdur-as ti probinsia.
Nakipaset iti okasyon ni Brigadier General Rhenante M. Salvador, a nagrepresentar iti Commander ti 5th Infantry Division (5ID) ti Philippine Army. Impakitana ti pannakaitalaga ti AFP a mangsuporta iti gobyerno probinsial tapno mapagtalinaed ti talna, seguridad, ken urnus iti intero a Ifugao.
Impanamnama ni BGen Salvador ti kinapateg ti panagtutulungan ti militar, lokal a gobyerno, ken komunidad tapno maliklikan ti panagsubli ti armadong gulo ken maprotektaran ti seguridad ti umili. “I commend the efforts of our security forces, particularly the Philippine Army and the Philippine National Police, for their tireless efforts in maintaining peace and order in your Province. Their bravery and selflessness have been a source of inspiration to us all”, kinuna ni 5ID Commander.
Iti mensahena, binigbig ni Governor Dalipog ti dakkel a paset ti AFP ken dagiti lokal a kakaduana iti panagballigi iti natalged a kasasaad iti probinsia. Kunana a daytoy ket napateg tapno umuneg ti socio-economic growth, mapatibker dagiti programa ti gobyerno, ken maprotektaran dagiti karbengan ti tao.
Ti panakaideklarar ti SSIPS ket paset ti agtultuloy nga aramid ti gobyerno probinsial, a kakuyugan ti AFP, tapno mapatibker dagiti mekanismo para iti talna ken seguridad, nangruna kadagiti lugar a napektaran iti gulo. Nalpas ti seremonia iti panangipakita ti panagtulungan dagiti amin a nakipaset tapno ipagtalinaed ti talna, panagkaykaysa, ken kaurnos ti Ifugao Province.
Source: 503rd Infantry “Peace & Justice” Brigade
