Sinentensiaan ti Regional Trial Court Branch 2 (Family Court ti Baguio City) ti maysa a padi nga alyas “Mark” ti three-counts ti panangrames na iti maysa a 16-anyos nga estudyante-eskolar ti Baguio Diocese. Isuna ket nasentensiaan ti reclusion perpetua wenno 20 to 40 a tawen a pannakaibalud, para iti Tunggal maysa a bilang.
Base iti kinuna ti abogado a timmulong iti biktima, napasamak dagiti sexual assaults idi Marso 2023 iti maysa a siled nga okupado ti biktima idiay Baguio compound. Pormal a iwinaragawag iti mangidadaulu a hues idi Huebes, Disiembre 18, 2025, nga agtultuluy jay pannakaibalud ti suspek idiay Baguio City Jail.
Iti panawen nga naaramid jay panaglabsing ket nagserbi ni alyas “Mark” a kas finance administrator ti Diocese ken general manager ti Catholic-run Mountain Province Broadcasting Company (MPBC) ken ti Montanosa Pastoral Resources Corp., a mangiturturong ti Porta Vaga Mall iti abay ti Baguio Cathedral.
Natakuatan ti Korte a nakabasol ti suspek iti guilty beyond reasonable doubt under Articles 266-A and 266-B of the Revised Penal Code, a nangidakamat a dua kadagiti panangrames ket na-aggravate gapu iti pannakausar ti ‘deadly weapon’ ken napasamak iti siled nga okupado ti biktimana iti uneg ti maysa a building iti uneg ti Diocesan compound.
Pinaneknekan ti biktima a namin-innem a narames isuna idi Marso 2023. Inladawan ti korte ti pammaneknekna kas mapagtalkan ken agtultuloy, bayat nga inlibak ti padi dagiti pammabasol, nga imbagana nga trabahu lang inkaskastana idi oras ken tiempo nga inbagan ti biktima. Naglemmeng ni alyas “Mark” kalpasan nga impadamag ti biktima dagiti panangraut ken simmuko laeng idi June 2024, dandani makatawen kalpasan a naipaulog ti warrant of arrest.
Malaksid iti pannakaibaludna, imbilin ti korte a bayadan jay suspek ti danyos ti nagreklamo. Para iti tunggal maysa kadagiti tallo a kaso, masapul nga agbayad iti ₱75,000 iti civil indemnity, ₱75,000 iti moral damages, ken ₱75,000 iti exemplary damages, amin ket maipaulog iti innem a porsiento a tinawen nga interes manipud iti pinal ti pannakaukom agingga a naan-anay a mabayadan.
