Ipinagdiwang ng Asipulo National High School, dating kilala bilang Amduntog National High School, ang kanilang ginintuang anibersaryo sa ilalim ng temang “50 Taon ng Kahusayan, Pagkakaisa, at Tagumpay” nito lamang ika 23 ng nobyembre 2024.
Ang makasaysayang okasyon ay naging mas makulay sa tulong ng seguridad na ibinigay ng Asipulo Municipal Police Station, sa pamumuno ni Poloce Captain Gregorio Buyayo, Acting Chief ng Asipulo MPS.
Sa kanilang presensya, naging mapayapa at maayos ang selebrasyon, na dinaluhan ng mga guro, mag-aaral, magulang, at mga alumni. Isa sa mga tampok na bahagi ng programa ay ang makabagbag-damdaming “Lighting of Candles” na sumisimbolo ng pagkakaisa at pasasalamat.
Ang seremonyang ito ay pinangunahan ng mga guro, mag-aaral, at alumni bilang tanda ng pag-alala sa mayamang kasaysayan ng paaralan at bilang panata sa patuloy na pagtataguyod ng edukasyon sa susunod na henerasyon.
Ang liwanag ng mga kandila ay nagbigay-inspirasyon at nagpaalala ng mahalagang kontribusyon ng paaralan sa komunidad.
Bukod dito, nagpakitang-gilas din ang mga mag-aaral mula Grade 7 hanggang Grade 12 sa pamamagitan ng makukulay at malikhaing pagtatanghal. Ipinamalas nila ang kanilang mga talento sa pagsayaw, pag-awit, at iba’t ibang cultural performances, na nagbigay-aliw sa mga dumalo at nagpamalas ng kanilang pagmamalaki sa paaralan.
Ang selebrasyon ay naging pagkakataon upang muling sariwain ang mayamang kasaysayan ng paaralan at ang mga tagumpay nito sa larangan ng edukasyon.
Ayon sa mga guro at alumni, ang Amduntog National High School ay naging saksi sa pagbabago ng Asipulo at patuloy na nagbibigay-inspirasyon sa mga kabataan na makamit ang kanilang mga pangarap.
Ang ika-50 anibersaryo ng paaralan ay hindi lamang naging simbolo ng kanilang kasaysayan kundi naging paalala rin ng mahalagang papel nito sa paghubog ng kinabukasan ng kabataan sa komunidad.
