LAOAG CITY – Balligi a naarestar ti uppat nga indibidual nga agaama a sumangsango iti kaso a frustrated murder iti Barangay San Julian iti ili ti Solsona.
Segun ken ni P/Cpt. Randy Damo, Hepe ti Solsona Municipal Police Station, ti biktima ket maysa a mannalon, adda iti umno a tawen ken residente ti Barangay San Julian iti ili ti Solsona idinto a dagiti suspek ket agaama a maysa a senior citizen ken ti tallo nga annakna nga adda iti umno a tawen ken residente dagitoy iti nasao met laeng a barangay.
Inbatadna a napilaan ti kaso a frustrated murder dagiti suspek kalpasan ti panagtagtagbatda iti rupa ti biktima gapu iti riri ti panagpadanum iti irigasionda.
Inlawlawagna nga agpapan iti daytoy a gundaway ket agpapaimbag pay laeng ti biktima ken manamnama a dumalan iti operasion iti mabiit.
Innayonna a natiliw dagiti suspek kalpasan a naiparuk-at ti warrant of arrest kontra kadakuada a maibilang a Top 1, Top 2, Top 3 ken Top 4 Wanted Person iti Municipal Level.
Source: Bombo Radyo Laoag
