Impaiwaras ti Department of Environment and Natural Resources (DENR) Region 1 ti 163 a titulo ti daga iti panangisayangkat na iti maikapat a leg ti DENR Express Permitting on Wheels, a pinasetan dagiti agarup 300 nga Ilocano manipud iti Maikadua a Distrito ti Ilocos Sur. Daytoy met ti nangilunsad iti selebrasion ti probinsia para iti Philippine Environment Month 2026 idi Hunio 4, 2026.
Ti programa ket paset ti inisyatiba ni DENR Secretary Juan Miguel T. Cuna a mangipadanon kadagiti tattao iti nalaklaka, napaspas, ken nasayaat a serbisyo ti gobyerno, kas panagtungpal iti bilin ni Presidente Ferdinand R. Marcos Jr.
Iti mensahe ni DENR OIC Regional Executive Director Atty. Ronnel C. Sopsop, impakitana ti panagtultuloy a panagserbi ti DENR babaen iti panangipaay kadagiti mas nalaka ken responsibo a serbisyo kadagiti komunidad. Kinunana a ti Handog Titulo Program ket mangipaay iti namnama ken seguridad kadagiti pamilya babaen iti pannakaikkan iti legal a pagtagikuaan iti daga.
Impaay met ni Candon City Mayor Eric D. Singson ti suporta na iti programa ken pinadayawna ti inisyatiba ti DENR a makatulong iti panagbiag dagiti umili.
Kadagiti 163 a naited a titulo, 99 ket para iti agrikultural a daga, 63 para iti residential, ken maysa para iti special patent. Ti programa ket naggapu iti panggep a mapaspas ti pannakaipatangken ti pagtagikuaan dagiti kwalipikado nga indibidwal ken institusion kadagiti publikong daga.
Nasaksian met ti okasion dagiti opisiales ti DENR Region 1, a mangipakita iti pannakikadua ti ahensia iti panangipaay ti serbisyo para iti kaaduan.
Source: DENR 1
