Inlawlawag ti Malacañang ti isyu maipanggep iti panagretiro ni sigud a hepe ti Philippine National Police (PNP) a ni PGen Nicolas Torre III kalpasan ti adu a bulan a pannakalito. Segun ken Palace Press Officer Claire Castro, naurnos ti isyu ken addan iti ayos ti optional retirement ni Torre a mangited kenkuana ti amin a benepisio kas four-star general.
Idi pay un-unana, impakaammo ti National Police Commission (Napolcom) a pormal a nagretiro ni Torre iti serbisyo, ngem tinukiadna daytoy ken kinunana a awan ti naipasa a aplikasyonna. Uray kasta, agserbi itan ni Torre kas general manager ti Metropolitan Manila Development Authority (MMDA) ken agtultuloy a kwalipikado iti full four-star benefits segun iti agdama a linteg.
Iti press briefing idiay Palasyo, kinuna ni Castro a adda laeng bassit a di-panakaawat a dagus met a naurnos kalpasan a nakatungtongda ni Torre. Impaganetgetna a pinili ti Presidente ni Torre kas MMDA general manager, aktibo daytoy a mangtungpal iti pagrebbenganna, ken umawatto iti kompleto a benepisio gapu iti optional retirementna.
Kinumpirma pay ni Castro a inawat ni Torre ti panaglipat ti four-star rank iti kasukatna, isu a maur-uray a maipromote iti daytoy a ranggo ni PLtGen Jose Melencio C. Nartatez Jr., Acting PNP Chief. Inayon ti Palasyo a mabalin a leksion daytoy a pasamak tapno marepaso dagiti dadduma a probision ti PNP law ken maliklikan ti kapada a pannakalito iti masakbayan.
Source: Palace: Torre’s PNP retirement issue has been clarified | Philippine News Agency
