Posible a adda idiay Cambodia wenno Thailand ti masapsapul a negosyante a ni Charlie “Atong” Ang, segun iti pakaamo ti whistleblower a ni Julie Patidongan, a kinuna ti Department of the Interior and Local Government (DILG) idi Enero 22, 2026. Segun ken Interior Secretary Jonvic Remulla, mabalin a makaaramat ni Ang kadagiti “backdoor” a dalan tapno makaliklik kadagiti awtoridad.
Segun ken Patidongan, a star witness, adda ti akses ni Ang idiay Cambodia ken adda dagiti wagasna tapno makapan sadiay, ken us-usigen itan no nagaramat isuna iti backdoor route, kinuna ni SILG Remulla.
Maibatay iti impormasyon ti whistleblower, posible a nakapatakder ni Ang iti online sabong operations idiay Cambodia ken iti border area ti Thailand, kalpasan ti panaglipat dagiti dadduma a operasyon ti ilegal a sugal kadagitoy a lugar. Nupay kasta, nilawlawag ni SILG Remulla a beriberipika pay laeng ti gobyerno dagiti ulat sakbay a mangaramid iti dadduma pay a banag.
No mapaneknekan a adda ni Ang iti sabali a pagilian, kinuna ti hepe ti DILG a maipaay ti isyu ken Presidente Ferdinand R. Marcos Jr., gapu ta adda daytoy implikasion iti international relations. Impasitngay met ti Malacañang a prioridad latta ti gobyerno ti kaso dagiti maawawan a sabungero ken saan da a palubosan a makaliklik iti panagakem ti siasinoman a maisinggalot.
Kabayatan, impaganetget ni SILG Remulla a nupay adda dagiti paltug a naisuko manipud iti kampo ni Ang, agtultuloy latta a armado ken napeligroso isuna. Segun iti PNP Firearms and Explosives Office (FEO), isailalim iti ballistic examination dagiti naisuko a armas ken agtultuloy ti beripikasion iti ulat a adda ti maysa a baril a napukaw.
Impaganetget met ni PNP-FEO Chief PBGen. Jose Manalad Jr. a amin a hakbang ket maaramid segun iti linteg ken umno a proseso. Kinunana, “Ang PNP po ay mahigpit na sumusunod sa konstitusyon o sa mga umiiral na batas. Anumang law enforcement action, kabilang ang aplikasyon ng search warrant ay dumadaan sa tamang legal na proseso at kinakailangang may sapat na basehan. Hindi po tayo gumagawa ng hakbang na labag sa karapatan ng sinuman.”
Agtultuloy ti panagtugis ken Ang a addaan Php10 milyon a pabuya iti pannakaaresto na, kabayatan a maaw-awagan ti publiko a makitinnulong tapno tuloy-tuloy a maaresto ti suspek.
