Dagus a pimmusay ti driver ken maysa a pasahero iti puraw a van a natinnag sadiay Ampucao, Itogon, Benguet itay laeng agsapa January 26, 2026.
Dagiti biktima ket agpada a naasawaan ken residente iti Barangay Ampucao, Itogon, Benguet.
Maibasar iti report ti Itogon Municipal Police Station, ti van ket nagapo sadiay Sitio Saddle, Ampucao ken paturong sadiay Sitio Dacap tapno sukonen da koma dagiti kakadwa da a makiatendar iti kasar sadiay Green Valley, Baguio City ngem daksanggasat ta natinnag ti lugan iti nasurok kumurang 200 a metero iti kaadalem na a rangkis.
Dagus met a nagtitinnulong dagiti residente sadiay tapno ispalen dagiti dua ngem saan da a nakalasat. Gapu met ta indeklara ti doktor a pimmusayen dagitoy ket saan dan a naitaray pay iti ospital.
Iti agdama ket agtululoy pay laeng ti panagimbestigar ti kapulisan iti Itogon mainaig iti napasamak. Inaklon metten dagiti pamilya dagiti pimmusay ti napasamak kadakuada ken mamati da a ti napasamak ket maysa nga aksidente.
Source: DZWT 540 AM
Photo Courtesy: Itogon MPS
