Dakkel ti naitulong ti Philippine National Police (PNP) iti panangdadael iti nasurok Php186.4 milyon a halaga ti marijuana, punla, ken cannabis fruitings iti dakkel nga marijuana eradication operations ti Philippine Drug Enforcement Agency (PDEA) idiay amianan a Luzon.
Segun ken PDEA Director General Usec. Isagani Nerez, ti operasyon ket indauluan ti PDEA Regional Office I babaen ti Regional Special Enforcement Team (RSET), a kaduana dagiti nadumaduma a yunit ti PNP a nangipaay ti seguridad, operasyon, ken tulong iti panangdadael dagiti ilegal a taniman.
Dagiti aktibo a nakipaset a yunit ti PNP ket ti PRO I–Regional Mobile Force Battalion, Ilocos Sur PPO–Provincial Drug Enforcement Unit, Provincial Investigation and Detection Management Unit, 1st ken 2nd Provincial Mobile Force Company, PNP Drug Enforcement Group, ken Sugpon Police Station.
Naisayangkat ti innem nga aldaw a operasyon manipud Enero 16 agingga Enero 21 iti kabambantayan a lugar iti Ilocos Sur ken Benguet, kas iti Brgy. Licungan, Sugpon, Ilocos Sur ken Brgy. Tacadang, Kibungan, Benguet, agraman ti Mount Boa ken Mount Leteban.
Segun ken PDEA RO I Regional Director Atty. Benjamin G. Gaspi, natungpal ti panangdadael iti 144 a marijuana plantation a naglawlaw iti 106,500 metro kuwadrado. Nabunot ken dinadael ti 628,295 a dakkel a tanem ti marijuana (Php125.6M), 211,795 a punla (Php44.4M), ken 135 kilo a tuktok ti marijuana (Php16.3M).
Binigbig dagiti opisyal ti PDEA ti propesionalismo, disiplina, ken panagsagana dagiti tauhan ti PNP, a nangtulong iti natalged ken naballigi a operasyon. Daytoy a balligi ket mangipakita ti natibker a panagkaykaysa ti PNP ken PDEA iti pananglaban iti ilegal nga droga ken panangsalimetmet iti komunidad.
Source: https://pilipinomirror.com/p186-4-m-marijuana-winasak-ng-pdea/
