Inikkat ti Prosecutor’s Office amin a kaso nga insampa ti PNP kontra kadagiti pito nga miyembro ti anti-mining group idiay Bayombong, Nueva Vizcaya, idi kalman, Enero 26.
Malagip nga idi Enero 23, naaresto dagiti innem a babbai ken ti liderda a ni Florentino Daynos gapu ta kunada a hinarangda ti panagipatupad ti writ of preliminary injunction idiay Sitio Keon, Barangay Bitnong, Dupax del Norte. Ti writ ket mangibilin a ikkaten dagiti nakaharang iti dalan nga pagturongan ti mining company iti exploration site da.
Tig-tallu a kaso ti naisampa kontra kadagiti pito, kas iti Direct Assault, Resistance and Disobedience to an Agent of a Person in Authority, ken Obstruction, gapu iti panagaramidda iti “human barricade.” Kunada a laban daytoy iti bilin ni Judge Paul Attolba ti RTC Branch 30 idi Enero 19.
Iti consolidated resolution ni Prosecutor II Atty. Orville Ibarra, kinuna na nga awan ti umno ken sapat nga ebidensya kontra kadagiti akusado, isu a naikkat dagiti kaso. Kinuna met a nasorpresa ti depensa iti desisyon.
Segun kenni Daynos, daytoy ket maysa a naimbag ken patas a hatol, ken mangipakita a no adda hustisya, naragsak dagiti tattao ken nawaya ti panangipakita ti karbengan, lalo no ipaglaban ti daga ken ti masakbayan dagiti annak.
Naibaga met iti resolution nga saan a nalawag no sadino a lugar naipatupad ti writ—no daytoy ket paset ti barangay road wenno daga dagiti nagprotesta. Inayon ti piskalya a nagnipon laeng dagiti tattao tapno naurnos a maipakita ti saloobinda, a maysa a karbengan nga ipagtalinaed ti Konstitusyon. Inbilin met ti prosekusyon ti panangipalubos ken panagpalaya amin dagiti akusado.
