Nagsagawa ng Lingkod Pag-IBIG on Wheels (LPOW) sa iba’t ibang munisipalidad sa lalawigan ng Pangasinan ang Pag-IBIG Dagupan City Branch na nagsimula noong Agosto 15, 2022 at magtatapos sa Agosto 22, 2022.
Kabilang sa mga pangunahing serbisyo na kanilang iniaalok ay ang pag-update at pagberepika ng Pag-IBIG membership, pagtanggap ng pabahay, multi-purpose at calamity loan, pagtanggap ng retirement o death claims, offsite enrolment at issuance ng Pag-IBIG Loyalty Card Plus.
Ang mga miyembro at hindi miyembro ng Pag-IBIG Fund ay hinihikayat na gamitin ang mga serbisyong magagamit sa ilalim ng LPOW.
Nagsimula ang LPOW noong Lunes, Agosto 15, 2022 sa bayan ng Calasiao at nitong Agosto 19, 2022 ay nasa Mangatarem at Urbiztondo at sa darating na Lunes, Agosto 22, 2022 ay pupunta ang LPOW sa Bayambang, Pangasinan.
Ang nasabing programa ng Pag-IBIG ay isang paraan upang ilapit ang kanilang serbisyo sa ating mga kababayan at upang mahikayat ang mga hindi pa miyembro na magpamiyembro at nang matamasa ang mga benepisyong handog ng Pag-IBIG.
Source: PIA Pangasinan
