Ipatpatuloy ti Provincial Government of Cagayan (PGC) babaen iti Provincial Disaster Risk Reduction and Management Office (PDRRMO), a kaduana ti Civil Military Support Element (CMSE) ti United States Embassy, ti panangpapigsa iti pannakaammo ken kabaelan dagiti responder iti probinsia babaen iti Medical First Responder Training a nangrugi idi Martes, Hulyo 14, 2026 nga agpatingga iti Huwebes Hulyo 16, 2026.
Nagtinnulong dagiti PGC ken CMSE iti panangipaay iti daytoy a panagsanay tapno mapapigsa ti kapasidad dagiti responder iti panangipaay iti napardas ken umno a tulong-medikal iti oras dagiti emerhensia.
Kinuna ni Rueli Rapsing, focal person ti Cagayan PDRRMO, a dakkel ti maitulong ti daytoy a panagsanay iti panangisagana kadagiti responder iti panangtubngar kadagiti insidente a mangkasapulan iti medical assistance.
Daytoy a panagsanay ket tapno mapauneg ti pannakaammo ken mapapigsa ti teknikal a kabaelan dagiti responder babaen iti pannakaadal iti S.M.A.R.C.H. wenno Scene Safety, Massive Hemorrhage, Airway, Respirations, Circulation, ken Head Injury/Hypothermia.
Babaen iti daytoy, mas mapapintas ti koordinasion ken kalidad ti panagresponde kadagiti emerhensia tapno masigurado ti kinatalged dagiti pasyente ken komunidad.
Source: Cagayan Provincial Information Office
