SAN FERNANDO CITY, La Union — Inyab-absen ti Department of Environment and Natural Resources (DENR) Ilocos Region ti “Permitting on Wheels” caravan idiay SM City La Union manipud Abril 21 agingga Abril 23, kas paset ti panangselebrar iti Earth Day. Ti inisyatiba ket naglalayong mangiyasideg iti serbisyo ti gobyerno kadagiti umili babaen iti napartak ken nalaka a pannakipaay ti environmental services, a mangpababa iti oras ti panagproseso ken mangikkat iti kasapulan a mapan iti adu nga opisina, kabayatan a mapapigsa ti panangipatungpal iti environmental laws ken responsable a panagusar kadagiti natural a pagtaengan.
Babaen iti Provincial Environment and Natural Resources Office La Union (PENRO La Union), maipapaay dagiti nadumaduma a serbisyo a kas iti Agricultural/Residential Patent Land Status Certification, Chainsaw Registration ken Tree Cutting Permit, Wildlife Registration Application, Sustainable Forest Land Management Agreement Application, Private Tree Plantation Registration, Miscellaneous/Foreshore Lease Agreement Application, Water Permit Application, Certificate of Verification para iti transportasyon ti bamboo ken charcoal, ken Local Transport Permit para iti wildlife ken science research specimens.
Adda met dagiti information booths ken educational exhibits a mangitag-ay iti pannakaammo ti publiko maipanggep iti panangsalaknib ti aglawlaw ken panangpabileg iti aktibo a partisipasion ti komunidad iti conservation efforts. Inyimbitar ti DENR Ilocos dagiti amin nga umili a makipaspaset iti daytoy nga aktibidad ken agpaay kadagiti kasapulanda a permit ken serbisyo iti nasao a lugar.
Source: PIA ILOCOS
