Nakarang-ay dagiti pammabasol a ti Baguio City District Engineering Office ti Department of Public Works and Highways (DPWH) ket saan a nangipatungpal iti bilin ni DPWH Secretary Vince Dizon a mangipaay iti nalawag ken patas a bidding para kadagiti proyekto ti gobyerno.
Segun iti maysa a pagtaudan iti opisina, iti bidding a naaramid idi March 5 ket maysa laeng a contractor ti nakagun-od iti proyekto gapu ta isu laeng ti adda batching plant. Dagiti dadduma pay a construction firms ket nagipila met laeng a makipartisipar ngem saan ida a nakaqualify gapu iti dayta a rekisito.
Nauna a kinunana ni Dizon a saanen a kasapulan ti panagtagikua iti batching plant kas rekisito iti bidding ti DPWH projects tapno mapapigsa ti patas ken transparent a procurement process.
Nupay kasta, ti Bids and Awards Committee ti distrito ket kinunana a saan pay a nakareceive ti opisyal a memorandum manipud iti DPWH central office a mangikkat iti dayta a rekisito.
Segun kadagiti rekord ti DPWH Transparency Portal, ti Goldrich Construction ket nakagun-od iti nasurok P1 bilyon a balor dagiti proyekto manipud 2021 agingga 2025 iti nasao a distrito.
Ti isyu ket nangbangon iti pakaseknan kadagiti contractors ken observers maipapan iti panagpatungpal dagiti procurement reforms ken iti panangsigurado iti patas ken nalawag a bidding process iti ahensiya.
Source: Daily Tribune
