Patitibkeren ti 86th Infantry “Highlander” Battalion ti 5ID, Philippine Army, ti panagbantay ken monitoring idiay Dupax del Norte, Nueva Vizcaya, kalpasan ti protesta dagiti residente idiay Sitio Keon, Brgy. Bitnong a kontra iti plano a mining exploration ti maysa a kompanya.
Kinuna ni 2LT Donebing Petalcorin, CMO Officer ti 86IB, a nupay naideklarar a insurgency-free ti Nueva Vizcaya, agtultuloy laeng ti panagalerto ti yunit tapno saan a maaramat ti isyu dagiti mangrekrut ti makakaliwa a grupo.
Kinuna na pay a posible a aramaten ti Communist Terrorist Group (CTG) ti kasta a isyu tapno makaparsua ti saan a panagragsak iti gobyerno ken maallukoy dagiti residente. Impatalged ti 86IB a awan ti lugar dagiti makakaliwa iti sakupda ken agtultuloy da a mangipasigurado iti seguridad ken kinasalun-at dagiti umili.
Nauna a nag-viral ti protesta dagiti anti-mining defenders kontra iti Woogle Mining Corporation, a pito a persona ti naaresto kalpasan a nagaramidda ti human barricade bayat a ipatpatungpal ti pulisya ti writ of preliminary injunction (WPI) manipud iti korte.
Gapu iti daytoy a napasamak, adu dagiti residente ken netizens ti nangipakita ti simpatiya ken pannakidanggay iti kasasaad dagiti umili ti Barangay Bitnong.
