Naurnong ti pitopulo (70) a bags ti dara manipud kadagiti boluntario a donors kasabay ti kick-off ceremony ti National Disaster Resilience Month (NDRM) idi Myerkoles, Hulyo 1, 2026, a naangay idiay Capitol Gymnasium, Tuguegarao City.
Pinanguluan ti Provincial Disaster Risk Reduction and Management Office (PDRRMO) ti nasao a bloodletting activity. Kabilang kadagiti boluntario a donors dagiti responders ti Task Force Lingkod Cagayan–Quick Response Team (TFLC-QRT), dagiti empleyado ti Provincial Office for People Empowerment (POPE), ken dagiti uniformed personnel iti probinsia kas Philippine National Police (PNP), Armed Forces of the Philippines (AFP), ken Philippine Coast Guard (PCG) a nangipakita iti pannakikadua ken suporta iti makatao nga inisyatibo.
Ti Bloodletting Activity ket naisayangkat iti pannakitinnulong ti Provincial Health Office (PHO) tapno masigurado ti agtultuloy a suplay ti dara iti Cagayan Valley Medical Center (CVMC) a makatulong kadagiti pasyente ken iti pannakasagana iti oras dagiti emerhensia ken kalamidad.
Ti panggep ti daytoy nga aktibidad ket tapno mapagtalinaed ti umdas a suplay ti dara para kadagiti masapul iti panagagas, kasta met a mapapigsa ti pannakitinnulong dagiti ahensia ti gobyerno iti panagsagana ken panangtubngar kadagiti kalamidad ken dadduma pay nga emerhensia iti probinsia.
Source: Cagayan Provincial Information Office
