Naipaay iti maysa a napili a benepisiario idiay Brgy. Nalsian Sur iti Hulyo 1, 2026, ti maika-19 a kubo babaen iti proyekto a “Grand Ukay for a Cause” ni Mayor Niña.
Segun iti panangbalidate ti Municipal Social Welfare and Development Office (MSWDO) ken Bayambang Municipal Link, ti balay da G. Brian Japson de Vera, maysa a tricycle driver, ket dakkel ti peggadna a marba uray ania nga oras gapu ta nadadael kalpasan a natinnag ti kayo iti rabawna. Nupay kasta, isu pay laeng ti pagnaedan ti pamilya gapu ta awan da iti kabaelan nga agpatakder wenno agpaurnos iti baro a pagtaengan.
Gapu iti kasasaad ti pamilya, isu ti napili a makaawat iti maika-19 a kubo, a donasyon ti Pangasinan Brotherhood USA kas suporta iti nasao a proyekto.
Imun-una ni Councilor Raymund Camacho ti panangidanon iti kubo iti lugar ti benepisiario kas representante ti organisasion. Nakitinnulong met dagiti opisiales ti LGU, pakairamanan ni Councilor Rhyan de Vera, Engineering Office, Administrator’s Office, ken BPRAT, a nangited pay iti ad-adu a donasyon a kas iti solar lights, solar panel, ken solar fan tapno ad-adda a makatulong iti panagbiag ti pamilya.
Ti inisyatibo ket mangipakita iti panagtinnulong dagiti ahensia ti gobyerno ken dagiti pribado a grupo iti panangipaay iti natalged ken naurnos a pagnaedan kadagiti pamilyang agkasapulan iti komunidad.
Insurat ni IlocanoAk
Source: Balon Bayambang
