Nagpalagip ti Benguet Electric Cooperative (BENECO) iti publiko nga agalwad iti panangipablaak iti ladawan iti electric bill iti social media gaputa mabalin daytoy a mangitunda iti pangta iti seguridad ken personal a datos.
Sigun iti palagip, dagiti nalawag a ladawan iti bill ket mabalin a naglaon iti sensitibo nga impormasion a kas iti nagan, address, account number, meter number, ken konsumo iti kuryente. Nu naibinglay iti online, mabalin daytoy a maaramat iti panangloko, identity theft, ken phishing scams.
Impaganetget iti nasao a kooperatiba a mabalin nga aramaten dagiti cybercriminal ti naala a detalye tapno agpammarang kas customer, mangipatulod iti peke nga abiso iti bayadan, wenno ammuen ti posible nga aktibidad iti uneg iti pagtaengan.
Ginuyugoy iti BENECO ti publiko a saan a basta laeng a mangipost iti bill online, ken nu kasapulan ket i-blur ti personal nga impormasion sakbay daytoy nga ibinglay.
Nasaysayaat metlaeng nga ipakaamo dagiti reklamo iti official customer service channels ngem iti social media.
Mabalin a makikoordinar iti publiko iti BENECO iti opisinada iti South Drive, Baguio City wenno iti official hotline, mobile numbers, ken email para kadagiti damag wenno reklamo.
Source: Bombo Radyo Baguio
