Nangrugi ti Department of Science and Technology Science Education Institute iti maysa a scholarship program para kadagiti Indigenous Peoples (IP) students idiay Nueva Vizcaya State University.
Daytoy ti umuna a pannakaipatungpal ti “Bridging Education in Science and Technology for Indigenous Peoples” wenno BEST for IP Scholarship Program iti unibersidad. Segun kenni Dr. Jayeel Cornelio, Director ti DOST-SEI, ti programa ket mangted iti naimbag a gundaway kadagiti agtutubo a katutubo a nakapasa iti NVSU College Admission Test para iti academic year 2026-2027.
Target ti scholarship a suportaran dagiti freshman students a kayat nga agtultuloy iti STEM courses. Limapulo a estudyante kada tawen ti mapili a scholar iti programa. Maawatda ti saba-sabali a benepisyo a kas iti stipend a naggatad ti Php40,000 kada semester, wenno Php8,000 kada bulan, learning allowance a Php10,000 kada tawen, tulong iti pamasahe, research allowance, ken suporta para iti academic conferences ken leadership programs. Imbaga met ni Dr. Wilfredo Dumale Jr., Presidente ti NVSU, a halos kaguduan dagiti naglippas iti NVSU idi napalabas a tawen ket naggapu kadagiti 18 a nagduduma a grupo dagiti katutubo.
Inayonna a adda iti agarup 2,000 IP students a naka-enroll iti unibersidad. Nupay kasta, kinunana a masapul a STEM courses ti pagadalanda tapno maikwalipikarda iti BEST-IP scholarship. Mabalin met a mangisubli wenno mangibaliw dagiti non-STEM students iti STEM programs no kayatda nga ag-aplikar iti scholarship.
Kinuna ni Dr. Cornelio a nupay 50 laeng ti maawat kada tawen, isu da ti “best of their generation.” Inlawlawagna pay a tunggal tawen ket maaddaan manen iti 50 a baro a IP scholars, malaksid pay kadagiti 54,000 a scholars ti DOST iti entero a pagilian. Namnamaen dagiti opisial ti NVSU a daytoy a programa ket manglukat iti ad-adu a oportunidad para kadagiti katutubo tapno maituloyda ti panagadalda ken maabotda dagiti pangarapda.
Nangrugi ti panangawat iti aplikasyon idi Mayo 4 ken agpatingga iti Mayo 18, sakbay ti examination iti Mayo 29. Dagiti interesado ket mabalin nga agdamag iti scholarship office ti NVSU para iti ad-adu pay nga impormasyon.
Source: DWRV1233.Official
