Naparagsak dagiti awtoridad iti maysa a posible a pagturongan iti panagsapul da kenni Patrolman Aaron Langab Blas kalpasan ti pannakasarakan ti maysa a sombrero iti asideg ti karayan idiay Itogon. Nupay kasta, kalpasan ti tallo nga aldaw a masinsin nga operasyon, awan pay laeng ti baro a pamatnagan iti pannakapukawna.
Inyus-usar dagiti operatiba ti Benguet Police Provincial Office dagiti panagsapul manipud Abril 28 agingga Abril 30, kalpasan ti maysa nga anonymous a report maipanggep iti nasarakan a “lousy hat” iti asideg ti Talnag Falls iti Barangay Ampucao. Daytoy a sombrero ket maibilang a tactical wide-brimmed hat a kadawyan nga us-usaren dagiti personnel iti field operations.
Sigun kadagiti pulis, nasarakan ti sombrero a nakabitay iti maysa a steel pipe iti entrance ti karayan. Ti umuna a panangusisa ket nangipakita iti presensya ti lumot iti unegna ken nasira a parte a saan nga addaan iti aniaman a marka nga makailasin. Saan pay a napasingkedan no daytoy ket kukuana ni Blas.
Gapu iti posibilidad nga adda koneksion daytoy iti pannakapukaw ni Blas, nangipatulod dagiti pulis iti dua a search and rescue teams a buklen dagiti 27 a personnel. Sinukimatda dagiti paset ti Sal-angan River, spillway area, ken dagiti asideg a lugar kas iti Bito Falls ken Talnag River, babaen ti tulong dagiti umili.
Nangrugi ti operasyon babaen ti pre-deployment briefing tapno maiplano dagiti lugar a sukisoken ken pagyanan dagiti teams iti rabii. Iti sumaganad nga aldaw, intuloyda ti panagsukimat iti daga ken panangusisa kadagiti posibleng paglabasan manipud iti lugar a nakasarakan iti sombrero.
Nupay kasta, awan ti nasarakan a baro a pammaneknek wenno aniaman a bakas ni Blas. Ni Blas, nga maysa a trainee iti Regional Special Training Unit Cordillera Administrative Region, ket naudi a nakita idi Hulyo 14, 2025 iti panawen ti land navigation exercise idiay Ampucao. Agpapatuloy ti panagsapul, ken manayun ti panawagan dagiti awtoridad iti publiko nga mangted iti aniaman a mapagtalkan nga impormasyon kadagiti pulisya.
