Temporaryo a sinuspende iti Mines and Geosciences Bureau (MGB) – Department of Environment and Natural Resources ti mining exploration permit iti Woggle Corporation sadiay Barangay Bitnong, Dupax del Norte, Nueva Vizcaya.
Ti nasao nga order ket napirmaan idi February 5, 2026, ken nai-address kenni Woggle President Tommy E. Alfonso, a nangilanad iti dagus a pannakaisardeng ti aniaman nga aktibidad iti kompanya maibasar Exploration Permit No. EP000030II, nga immuna a naiyulog iti sidong ti Republic Act No. 7942 (Philippine Mining Act of 1995) ken iti DENR Administrative Order 2010‑21.
Dinakamat ti MGB ti “force majeure situation”, gapu iti panangsustenar ti komunidad iti nainget a panangtubngar ken ti panagtalinaed iti barikada ken dagiti agbarbatikada iti nasao a lugar. Segun iti nasao a bureau, ti panagtalinaed dagiti kontra iti nasao nga aktibidad iti kompanya ket nagresulta iti risgo iti linak ken kappia ken iti talged iti amin a maseknan.
Naibilin iti Woogle Corp. a dagus nga isardeng ti amin nga exploration activities iti sakop iti naiyulog a permit.
Maibasar iti dokumento, ti order ket pinirmaan ni Michael V. Cabalda, Assistant Secretary for Mining Concerns and concurrent OIC Director of the MGB.
Source: DZWT 540 AM – News & Information
