Naiproklama a Champion of the Champions ti Kuya Bik’s Panciteria a nakapwesto iti Caggay Hi-way ken kukuana ni Victorino Lucina, iti naangay a Pancit Festival 2026 idi Agosto 9, 2026 idiay Tuguegarao City, Cagayan. Nakaawat ti kampeon iti Php30,000 a cash prize ken dadduma pay a papremyo iti kompetision a paset ti panangselebrar iti Pavvurulun Afi Festival.
Pinanguluan ni Metropolitan Manila Development Authority (MMDA) General Manager Gen. Nicolas Torre III, a maysa kadagiti hurado, ti panangipakaammo iti kampeon kalpasan ti kompetision dagiti 12 a panciteria iti tinawag a Battle of the Champions. Kinuna ni Gen. Torre a amin dagiti inihain a pancit batil patong ket naiimas, isu a naannad a sinukimat dagiti hurado ti puntos dagiti kalahok babaen iti plating, ramraman ti pancit, toppings, ken sabaw. Nakipaset kas hurado da Civil Service Commission (CSC) Regional Director Fernando M. Porio ken chef Dianne Camayang.
Iti mensahena, inyaman ni Tuguegarao City Mayor Maila Rosario S. Ting-Que dagiti amin a nakilahok ken nangsuporta iti aktibidad, a mangipakita iti panagkaykaysa iti panangitag-ay iti food tourism iti siudad babaen iti maipannakkel a pancit batil patong. Saan met a nakalapped ti tudo iti panagtultuloy ti Pancit Festival, agraman ti panangbigbig kadagiti 12 a panciteria a nakipaset iti kompetision. Tinanghal met a Cleanest Working Station ti Rab Panciteria.
Naiselebrar ti Pancit Festival tapno mapapigsa ti food tourism iti Tuguegarao City babaen iti panangiparang ken panangitag-ay iti pancit batil patong kas maysa kadagiti maipannakkel a lokal a produkto ti siudad. Iti Pancit Eating Contest, nagbalin a kampeon iti Male Category ni John Cristian Fabroa, sinurot da Jan One Romina ken Diosdado Baclea-an, bayat a iti Female Category ket ni Lovely Lagundi ti kampeon, sinurot da Jenai Bata ken Jessa Bassig.
Source: LGU Tuguegarao City Official
