Natay ti drayber ti motorsiklo kalpasan a makadinnungparna ti maysaa multicab ken motorsiklo iti provincial road iti Barangay Bucalag, Santa, Ilocos Sur.
Ti drayber ti multicab ket lalaki nga agtawen iti innem a pulo ket maysa, agnaed iti Barangay Magsaysay District, Santa.
Ti met drayber ti motorsiklo ket lalaki nga agtawen iti duapulo ket maysa, agnaed iti Barangay Labut Sur, Santa.
Agpada nga agturong iti abagatan dagiti dua a lugan idin ta nagmenor ken nag-U-turn ti multicab.
Saan a nadlaw ti drayber ti multicab ti sumarsaruno a motorsiklo a napaspas ti patarayna isu a naidungpar iti kannigid a paset ti lugan.
Naipurwak ti drayber ti motorsiklo ket naawanan iti puot.
Nagsagaba daytoy iti dunor iti ulo ken adu a gasgas iti nadumaduma a paset ti bagina a puon ti nakatayanna.
Kabayatanna, nagasgasan met ti ulo ti drayber ti multicab ken agalenna ti nasakit nga abagana.
Naipaagas iti ospital dagiti dua a drayber para iti naan-anay a pannakatamingda ngem saanen a nakalasat ti nagmaneho iti motorsiklo.
Source: Bombo Radyo Vigan
