Nakaawat ti tulong a non-food items dagiti 400 a pamilya a biktima ti Super Typhoon Uwan iti Barangay Aggub, Solano, Nueva Vizcaya kalpasan a nangidaulo ti Philippine Red Cross (PRC) iti panagipaay ti ayuda idi Biernes, Enero 30, 2026. Malagip a ti bagyo ket immulog idi Nobiembre 2025 ken nangidulot iti dakdakkel a pannakadadael iti adu a komunidad.
Pinangulowan ni Randy Blanco, Chapter Administrator ti Red Cross Nueva Vizcaya, ti sabay-sabay a panagipapaay ti non-food items a maar-aramid met kadagiti sabali pay a paset ti pagilian. Segun kenkuana, dagiti residente laeng ti Barangay Aggub ti napili a benepisyaryo gapu ta isuda ti nakitaan a kaaduan a mangkasapulan ti agar-aramid a tulong, segun iti inaramid a assessment ti organisasion.
Impanamnama ni Blanco a kas maysa a humanitarian organization, limitado met ti pondo ti Red Cross. “Maliban po sa ibang munisipyo na in-assess namin, mas nangangailangan po ang Barangay Aggub ng assistance kaya dito po namin in-award (Kadagiti amin a munisipio a na-assess mi, mas nangangkasapulan ti Barangay Aggub iti tulong, isu a ditoy mi impaay ti asistencia),” kuna ni Blanco.
Inayon pay ni Blanco a ti naipapaay a tulong ket donasion ti International Federation of Red Cross and Red Crescent Societies (IFRC). Sangapulo ket lima (15) a probinsia iti entero a Pilipinas ti nagbalin a benepisyaryo ti programa, a nangtulong kadagiti biktima dagiti napigsa a bagyo ken linog.
Karaman kadagiti non-food items a naipangted ket dagiti kagamitan iti pagluto ken kusina a kas iti palayok, kaserola, pinggan, plato ken dadduma pay; hygienic parcels a naglaon iti sabon, toothpaste, toothbrush, tuwalya ken dadduma pay. Adda pay met naipangted a kumot, banig, kulambo ken sabali pay a kasapulan iti pangaldaw-aldaw a biag.
“Sana po pagdating ng mga ganitong kalamidad ay lagi po tayong handa at makipagtulungan po sa ating gobyerno lalo na sa Philippine Red Cross (Inayonak met a sapay koma ta iti sumarsaruno a kalamidad, agbalintayo koma a nakasagana ken makipagtinnulong iti gobyerno, nangruna iti Philippine Red Cross),” impakpakdaar ni Blanco. Inawisna pay dagiti umili a suportaran dagiti humanitarian activities ti PRC tapno agtultuloy ti panagipaay ti tulong no adda kalamidad.
Nagpasalamat met dagiti benepisyaryo iti panangidaulo ni Punong Barangay Felix Tolentino ken iti tulong a naipangted ti PRC, a kunada a dakkel unay a banag iti panagbangon da manipud iti epekto ti bagyo.
