Inkeddeng ti Regional Trial Court, First Judicial Region, Branch 8 ti La Trinidad, Benguet ti tungpal biyag a pannakaibalud iti dua a marijuana trafficker iti probinsya ti Benguet.
Sigun iti desisyon ti korte a napetsaan iti Setyembre 24, naduktalan a guilty dagiti dua a marijuana trafficker a nabigbig kas alyas ” Simple Heart” ken “Bagoling” iti pananglabsing iti Section 5 (Sale of Dangerous Drugs), Article II ti Republic Act No. 9165, wenno iti Comprehensive Dangerous Drugs Act of 2002. Naipataw idi dua a drug personalities ti tungpal biyag a pannakaibalud ken multa a dumanon iti sag-P500,000.
Ti nasao a kaso ket kasaruno iti naipatungpal a buy-bust operation idi Marso 3, 2026 idiay Betag, La Trinidad, Benguets no sadino nakumpiska dagiti otoridad ti agarup 19,894.82 a gramo ti dried marijuana leaves, stalks, ken fruiting topis a nakakabil iti agarup 20 tubular forms nga addaan iti Standard Drug Price (SDP) a dumanon iti agarup P2.3 Million.
Naipatungpal ti nasao nga operasyon babaen iti operatiba manipud the PDEA Regional Office Cordillera Administrative Region (CAR) Regional Special Enforcement Team ken Baguio Provincial Office, kadua ti PNP Benguet Drug Enforcement Unit, Provincial Intelligence Unit, Benguet Police Provincial Office, ken La Trinidad Municipal Police Station.
Sigun kenni Philippine Drug Enforcement Agency (PDEA) Director General Undersecretary Isagani R Nerez, ti pannakaipataw ti sentensya kadagiti dua a drug personality ket mangiparparangarang iti nainget nga operasyon ti nasao nga ahensya kontra iti droga.
Source: Bombo Radyo Baguio
