Nagballigi a naisayangkat ti Traffic Management Summit 2026 idi Agosto 20, 2026 idiay Tuguegarao City People’s Gymnasium, a nangtipon iti agarup 500 a partisipante manipud kadagiti Civil Society Organizations, line agencies, academe, transport sector, media, ken dadduma pay a stakeholders.
Pinagdiscusionan dagiti partisipante dagiti konkretong addang ken mabalin a solusion tapno agbalin a nasayaat, natalged, ken episyente ti sistema ti trapiko. Kabilang kadagiti kangrunaan a napag-usapan ti panukala a panang-amendar iti traffic ordinance ti siudad tapno maiparbeng kadagiti agdama a kasasaad ken kasapulan dagiti motorista, commuter, pedestrian, ken dadduma pay a road users.
Iti mensahe ni Mayor Maila Ting-Que, impaganetgetna ti kinapateg ti panagkaykaysa ken panagtitinulong tapno maurnos dagiti karit iti traffic management, nangruna iti agtultuloy a panagdakkel ti siudad ken panagdakkel ti bilang dagiti agusar kadagiti dalan. Nakipaset met iti diskusion ni Vice Mayor Pastor Ross Resuello, a kaduana dagiti miyembro ti Tenth City Council, kas paset ti panagbirok kadagiti solusion para iti nasaysayaat a sistema ti trapiko ken transportasion.
Ti Traffic Management Summit 2026 ket tapno makabukel iti nalawag a direksion ken konkretong rekomendasion para iti panangpasayaat ti traffic management system ti Tuguegarao City. Babaen iti panagtitinulong dagiti ahensia, sektor, ken stakeholders, namnamaen a mapapigsa ti panangimanehar iti trapiko para iti nasaysayaat, natalged, ken nalaka a panagbiyahe dagiti amin a road users.
Source: LGU Tuguegarao City Official
