Naragsakan dagiti umili ti Bautista, Pangasinan ti nalaklaka ken nasaysayaat a panaggun-od kadagiti serbisyo ti Philippine Statistics Authority (PSA) babaen ti pannakaangay ti PSA Mobile Civil Registration System (CRS) Service Caravan 2026 idi Oktubre 19–20, 2026, kas paset ti pannakarambak ti maika-37 a National Statistics Month.
Iti panangidaulo ti Lokal a Gobierno ti Bautista babaen kenni Municipal Mayor Hon. Rosemarie G. Gacutan, iti tulong ti Local Civil Registry Office (LCRO) ken pannakikadua ti PSA, naipaay kadagiti umili dagiti serbisyo a mainaig iti National ID ken panagala kadagiti PSA civil registry certificates.
Naangay ti umuna nga aldaw ti aktibidad idi Oktubre 19 idiay Bautista Event Center (Prof. Amado G. Espino Sr. Multi-Purpose Center), bayat a naituloy daytoy idi Oktubre 20 idiay Villanueva Covered Court.
Babaen iti daytoy a programa, naikkan dagiti umili ti gundaway a maasikaso dagiti kasapulanda a dokumento a mainaig iti personal nga identidad, pannakayanak, panagkasar, ken dadduma pay a napateg a rekord sibil, nga awan ti kasapulan a panagbiahe iti adayo a lugar.
Daytoy nga inisyatiba ket mangipakita iti napigsa a panagtitinnulong ti Lokal a Gobierno ti Bautista ken dagiti nasional nga ahensia tapno maiyasideg dagiti kangrunaan a serbisyo ti gobierno kadagiti umili.
Agtultuloy ti panangipangruna ti Pamahalaang Bayan ti Bautista iti nasaysayaat, nalaklaka, ken napardas a panagserbi, tapno masigurado a tunggal Bautistanian ket addaan iti gundaway a makagun-od kadagiti benepisio ken serbisyo ti gobierno.
Source: Bayan ng Bautista https://www.facebook.com/share/p/19KfLktH6T/
