Pinagtitibker dagiti kameng ti Regional Inter-Agency Committee on Anti-Illegal Drugs (RICAD) iti Rehiyon ti Ilocos ti panagtitinulongda a manglaban iti ilegal a droga iti panagtiponda iti Maikadua a Quarterly Meeting para iti 2026 idi Hunyo 24 iti ONE Ilocos Sur Hotel iti siudad ti Vigan.
Iti panangidalan ti Philippine Drug Enforcement Agency (PDEA), nagtinnipon dagiti nadumaduma nga ahensiya ti gobyerno tapno suruten dagiti programa, papigsaen ti koordinasion, ken pagplanuan dagiti estratehiya iti panangsalaknib manipud iti ilegal a droga, panangipatungpal iti linteg, panagagas, rehabilitasion, ken panangisubli kadagiti naapektaran iti komunidad.
Iti miting, inlawlawag ti Department of Agriculture (DA) Regional Field Office I dagiti farm-to-market road projects a makatulong iti panangsalaknib kadagiti komunidad manipud iti panagmula iti marijuana babaen iti pananglukat kadagiti lehitimo a pagbiagan ken oportunidad iti agrikultura.
Imbinglay met ti Treatment and Rehabilitation Center (TRC) La Union dagiti resulta ti naangay a regionwide stakeholders’ consultation, a nangiparangarang iti panagtitinulong dagiti ahensiya ken organisasion tapno mapapintas pay ti panagagas, rehabilitasion, ken panangisubli iti normal a biag dagiti tattao a makarekober manipud iti panagusar iti ilegal a droga.
Kinuna ni PDEA Ilocos Regional Director Julius Paderes a napateg ti aktibo a partisipasion dagiti komunidad iti pananglaban iti ilegal a droga. Sigun kenkuana, saan laeng a panangipatungpal iti linteg ti kasapulan, no di ket ti panagtitinnulong, pannakikadua, ken panagtitimpuyog ti amin a paset ti komunidad tapno agballigi ti kampanya kontra ilegal a droga.
Source: PIA Ilocos Region
