Nangisayangkat ti Liga dagiti Kawani (LINK), kaduada ti City Disaster Risk Reduction and Management Office (CDRRMO) ken City Environment and Natural Resources Office (City ENRO) ti Pamahalaang Panlungsod ti Tuguegarao, iti Tree Planting and Growing Activity idi Agosto 1 idiay Agro-Eco Tourism Park iti Barangay Namabbalan Sur, kas paset ti panangselebrar iti FamiLINK Month ken National Disaster Resilience Month iti bulan ti Hulyo.
Pinanguluan ni LINK President Gerald Valdez dagiti opisial ken kameng ti Liga dagiti Kawani iti panangmula iti agarup 300 a narra seedlings iti nasao a lugar, a mangipakita iti panagkaykaysa dagiti empleyado ti lokal a gobyerno iti panangsalaknib iti aglawlaw.
Ti panagmula kadagiti kayo ket mangiparang iti panangsuporta ti LGU Tuguegarao iti panangsalaknib iti kinaparsua ken panangpapigsa iti panagpartuat iti nadur-as ken natalged nga aglawlaw para iti komunidad.
Daytoy nga inisyatibo ket tapno mapabileg ti pannakaaywan iti aglawlaw, mapapigsa ti kinasagana ken katibkeran ti komunidad iti panangtubngar kadagiti natural a peggad ken kalamidad, ken masigurado ti natalged ken nasaysayaat a masakbayan para kadagiti umay a henerasion.
Source: LGU Tuguegarao City Official
