Napasinayaan ken nabendisionan ita a Hulyo 21, 2026 ti kauna-unahan a National Child Development Center (NCDC) iti Tuguegarao City, a naipatakder iti City Hall Grounds. Ti pasilidad ket mangserbi a lugar a mangsuporta iti umuna a panagadal ken panagdur-as dagiti ubbing iti siudad.
Pinanguluan da City Mayor Maila Rosario Ting Que ken dating Vice Governor Melvin Vargas Jr. ti ribbon-cutting ceremony kalpasan ti bendision a naipaay ni Rev. Fr. Rino Guaring, Parish Priest ti Shrine of the Divine Mercy. Iti mensahena, inyaman ni Mayor Maila ken dating Vice Governor Vargas iti naipaay a suporta iti pannakapatakder ti pasilidad, a mangipaay iti naalwad a gundaway kadagiti empleyado ti lokal a gobyerno ken dagiti asideg nga opisina a mangipasrek kadagiti annakda iti NCDC.
Kinuna met ni dating Vice Governor Vargas a tuloy-tuloy ti panangsuportana kadagiti programa ken proyekto a mangipangato iti pagimbagan dagiti ubbing. Inlawlawagna a ti Tuguegarao City ket maysa kadagiti sangapulo a lugar iti Cagayan a naipatakderan iti National Child Development Center idi panawenna kas Bise Gobernador. Nakiisa met iti aktibidad dagiti nadumaduma nga opisial manipud iti lokal a gobyerno ken nasional nga ahensia.
Naaramid ti National Child Development Center tapno maitag-ay ti holistic child development, mapapigsa ti pannakipaset dagiti pamilya iti panagdur-as dagiti annakda, ken masigurado a tunggal ubing ket maipaayan iti nasayaat a panangrugi iti edukasion ken naisagana para iti agtultuloy a panagadal ken panagballigi iti masakbayan.
Source: LGU Tuguegarao City Official
