Kidkiddawen ti kapamilya ti 52-anyos a lalaki, maysa a butcher ken residente ti San Carlos Heights, Irisan, Baguio City, iti hustisya gapu iti ipupusay ti ama da kalpasan a nabangga iti lugan. Sigun iti anak ti biktima, namnamaenda a maduktalan ti kinapudno ken sumungbat ti responsable iti napasamak.
Sigun kenni Pcpt. Johnsen Sauro Unay, Acting Station Commander ti Baguio City Police Office Station 9, pasado alas dos ti parbangon idi Agosto 6 idi nakaawatda iti awag maipapan iti insidente. Idi nadanonda ti lugar, nasarakanda ti 22-anyos nga drayber, estudyante ken residente met iti San Carlos Heights.
Iti inisyal nga imbestigasyon, pasado ala-una ti parbangon idi nabanggana ti biktima a magmagna iti kalsada bayat a paturong ti drayber iti national highway. Agur-uray pay laeng ti biktima iti taxi tapno mapan agtrabaho idi napasamak ti insidente. Gapuna, nagsagrap iti fatal injuries iti ulo ken naideklara a dead on arrival.
Naiturong ti drayber iti ospital para iti AB test ken nagpositibo daytoy. Naiturnover met ti kaso a reckless imprudence resulting in Homicide iti Traffic Enforcement Unit ti BCPO. Naitiliw ti drayber iti agarup lima nga aldaw sakbay a nakapagpyansa idi Agosto 11, 2026.
Sigun kenni Pcpt. James Allen Dogao, dadaulo ti Traffic Enforcement Unit, bailable ti kaso. Kiniddawda met iti LTO ti pannaka-issue ti showcause order para iti pannakarevoke ti driver’s license, ken naipaayan ti drayber iti citation tickets gapu iti reckless driving ken driving under the influence of liquor.
Agpampalagip dagiti opisial kadagiti motorista nga agannad iti panagmaneho, nangruna no panagtutudo, ken liklikanda ti panaginom iti nasanger no agmaneho. Itultuloy met ti hearing iti korte seknan iti kaso.
Source: Bombo Radyo Baguio
