Naballigi a naisayangkat ti Financial Capability Training-Seminar para kadagiti coordinators ti Hundred Islands KALIPI ken Self-Help Group (SHeG) kas paset ti panangpabileg iti pannakaammo maipanggep iti umiso a panangimanehar iti kuarta idi kalman Mayo 28, 2026.
Ti kangrunaan a panggep ti aktibidad ket tapno maited kadagiti kameng ti naan-anay a pannakaammo ken panangawat maipanggep iti kinapateg ti nasayaat a panangmanehar iti kuarta ken no kasano a mausar iti pondo tapno mapaunlad pay dagiti asosasyonda.
Babaen iti seminar, natalged a naibingay dagiti napateg a topiko a kas iti umiso a panagbudget, panagurnos iti gastus, panagimpok, ken epektibo a panangimanehar iti pondo ti organisasyon. Naipaganetget met ti kinapateg ti disiplina iti panagmanehar iti kuarta tapno masigurado ti napaut a panagdur-as dagiti samahan.
Impakaammo met dagiti nakipaset ti panagyaman da gapu kadagiti baro a pannakaammo a natakuatda nga isu ti makatulong saan laeng kadagiti asosasyonda no di ket uray iti bukodda a panagbiag.
Agtultuloy met dagiti katuwang nga ahensya ken organisasyon iti panangisulong kadagiti programa a mangted bileg kadagiti komunidad tapno mapabileg pay ti pagbiagan ken maaddaanda iti natalged ken nasaysayaat a masakbayan.
Source: LGU Alaminos
