Dinayaw ken pinagyamanan ni Police General Jose Melencio C. Nartatez Jr., Chief, Philippine National Police (PNP), dagiti amin a miyembro ti kapulisan gapu iti sipupuso ken napudno a pannakatungpalda iti pagrebbenganda, babaen iti panangipakitada iti nangato a lebel ti kinapropesyonal, disiplina, ken panagteppel iti bagbagida iti pannangsalaknib iti natalna a panagsisinnarak dagiti tattao iti public assembly nga inorganisar ti United People’s Initiative iti nadumaduma a paset ti pagilian idi Domingo, Hulyo 19, 2026. Daytoy ket naipakaammo idi Traditional Monday Flag Raising Ceremony iti Camp Crame, Quezon City, idi Lunes a bigat, Hulyo 20, 2026.
Iti mensahena, impaduyakyak ni CPNP Nartatez ti nauneg a panagyamanna ken panangidayawna iti panagsakripisyo, kinaanus, ken kinamatalek dagiti pulis a nangsalaknib iti talna ken kinatalged ti publiko, kabayatan a niraraemda ti karbengan dagiti umili a mangipahayag iti bukodda a kapanunotan ken sentimyento iti natalna ken nalinteg a wagas. Kinunana, “I commend each one of you in carrying your duties with professionalism, discipline and restraint.”
Impanamnama met ti PNP Chief a daytoy a balligi ket pammaneknek iti napigsa a panagkaykaysa ken di matilmon a pannakaitalaga dagiti pulis iti panagserbi iti pagilian. Babaen iti kinaulimek, kinaannad, ken responsableng panagaramidda, impakitada a ti panangipatungpal iti linteg ket mabalin a maiyannatop iti panagraem iti dignidad ken kangrunaan a karbengan ti tunggal Pilipino.
Pinagyamanan met ni CPNP Nartatez dagiti amin a personnel a saan a nabannog a nagserbi uray iti tengnga dagiti karit a sinangoda. Indayawna ti kinatured, dedikasyon, ken kinamatalekda iti serbisyo, ken inkeddengna kadakuada nga itultuloyda ti panangipakita iti naimbag a pagwadan ti disiplina, kinapropesyonal, ken sipupuso a panagserbi iti panangsalaknib iti talna, kinatalged, ken pagimbagan ti entero a pagilian.
