Naisayangkat ti Community Fire Auxiliary Group Barangay Fire Olympics 2026 idi Dariuk Hills, Barangay Balintocatoc, Santiago City idi Hulyo 11, 2026. Ti aktibidad ket pinanguluan ti Bureau of Fire Protection (BFP) Santiago City Fire Station tapno mapapigsa ti kinasagana dagiti barangay iti panangtubngar kadagiti insidente ti uram.
Pinanguluan ni Fire Chief Inspector Jay-R Guillano, City Fire Marshal, ti nasao nga aktibidad a nakipasetan dagiti nadumaduma a barangay iti siudad. Nakitinnulong met ti BFP Isabela babaen ni Provincial Fire Marshal Fire Superintendent Erwin Casil, ken dagiti opisial ti lokal a gobyerno, a pakairamanan ni City Councilor Gino Abaya Siquian a kas representante ti Punong Lungsod, kasta met dagiti representante manipud iti SSAA ken DILG.
Iti panagtagis, naiproklamar a Overall Champion ti Barangay Rosario, bayat a nagun-od ti Barangay Luna iti 1st Runner-up ken Barangay Sta. Rosa iti 2nd Runner-up. Nagballigi met ti Barangay San Isidro iti Hose Laying and Replacement, Barangay Sta. Rosa iti Flammable Liquid Fire Extinguishment, ken Barangay Divisoria iti Traditional Bucket Relay ken Best in Uniform.
Ti Barangay Fire Olympics ket tapno mapapigsa ti pannakaammo, disiplina, ken praktikal a kabaelan dagiti barangay officials, volunteers, ken komunidad iti pannakapreparar ken panangtubngar kadagiti insidente ti uram ken dadduma pay a kalamidad, tapno mapasalakniban ti biag ken sanikua dagiti umili.
Source: BFP Region 2
