Nagaramid dagiti anti-mining advocates iti maysa a programa iti sango ti Dupax del Norte PNP idi kalman, Enero 24, 2026, a mangipakita ti suporta kadagiti kakaduada a naaresto. Malagip a pito a kontra-mining a kakaduada ti naaresto idi kalman bayat ti panangaramidda iti barikada kalpasan a naisilbi manen ti writ of preliminary injunction.
Indauluan ni Fr. Frans Balinggan, Parish Priest ti Saint Vincent Ferrer iti Dupax del Sur, ti panagkararag a mangkiddaw iti panagkaykaysa ken pigsa tapno agtultuloy ti laban kontra iti pagmimina.
Kunana ni Fr. Balinggan nga agpalpalalo ti laban kontra mining, isu a masapul met ti kinaserioso dagiti umili. Kunana nga haan da a mabuteng iti panang-aresto, uray pay no adu ti pulis, ta patienda nga adda ti Dios kadakuada ken haan da a matalo uray adda ti temporaryo a rigat.
“Palalim ng palalim ang laban kontra mining, ibig sabihin seryoso sila, seryoso din kami, di kami titigil, di matatakot sa pag-arestong yan, kahit ilang libong pulis ang dalhin doon, di kami matatakot, naniniwala kami na nasa amin ang Diyos kaya di kami matatalo. May temporary setback man pero di kami matatalo dito, tuloy pa rin ang laban,” kinuna ni Fr. Balinggan.
Ipakpakaammo dagiti kakaduada ti suporta da kadagiti naidetene iti Dupax del Norte PNP babaen iti programa, tapno mangngeg dagiti adda iti uneg ti istasyon dagiti mensahe a haan da a baybay-an dagiti naaresto.
Nagipakita met ti suporta ni Dupax del Norte Vice Mayor Ric Ronelson Asuncion, nga kunana a kadua dagiti umili ti SB iti panaglaban. Innamnama na a maisubli manen ti talna, panagkaykaysa, ken natalged a pagyanan iti Dupax del Norte.
Iti kabayatan, kinuna ni Atty. Fidel Santos nga masapul a masurot ti court order, ngem kinuwestiyon na ti panang-aresto iti maysa a mag-ina ken iti lider a ni Florentino Daynos. Nagpasalamat met ni Daynos kadagiti mangsuporta ken kinunana nga agtultuloy latta ti laban para kadagiti daga, pamilyada, ken komunidad, bayat a nag-aambagan dagiti supporters para iti piyansa dagiti naaresto.
