Nirespondean ti Baguio City Police Office- Police Station 7 ti maysa a impablaak ti maysa a concern citizen iti social media seknan iti mapagduaduaan nga aktibidad ti maysa a lalaki pasado, alas-kuwatro ti malem ita nga aldaw idiay Otek Street, Baguio City.
Sigun iti concern citizen, naalaanda ti ladawan ti nasao a lalaki itay agsapa. Apaman a naamuwan dagiti otoridad ti nasao a pablaak, dagos a nagturong dagiti kameng ti BCPO Station 7 iti nasao a lugar tapno kumpirmaren ti sitwasyon.
Sigun iti pablaak ti nasao a concern citizen kas panangballaag iti publiko, agay-ayam ti lighter ti nasao a lalaki.
Nupay kasta, apaman a nakadanon iti lugar dagiti kapulisan, saandan a nasarakan ti daytoy.
Iti pannakiuman dagiti otoridad kadagiti store owners iti nasao a lugar, saanda a nakita ti nasao a lalaki a mismo nga agar-aramat iti ilegal a droga. Naireport laeng daytoy a nagsindi iti maysa a narolyo nga aluminum foil a naka-attach iti straw, a mabalin a namisinterpret.
Innayon pay dagitoy a sigud a makitkita a magmagna iti siudad ti nasao a lalaki a mapapati nga addaan iti mental wenno behavioral concerns.
Impasigurado met dagiti otoridad ti umno a tulong wenno referral iti kanito a masarakan ti lalaki tapno maipaay ti umno a tulong para kenkuana.
Agtultuloy met ti panangmonitor ti nasao nga ahensya iti publiko.
Source: Bombo Radyo Baguio
