Natay ti maysa nga estudiante bayat a dua pay ti naisalakan kalpasan a natinnag iti bangin o ravine ti motorsiklo a pagluganan da idiay Sitio Maano, Brgy. Galonogon, Aguinaldo, Ifugao idi rabii ti Hulyo 18, 2026. Naawat ti Aguinaldo Municipal Police Station ti tawag babaen iti Unified 911 iti agarup alas-9:20 ti rabii maipapan iti aksidente.
Dagus a simmungbat dagiti pulis ken napan da iti lugar. Nakikoordinar da iti Bureau of Fire Protection (BFP), Municipal Disaster Risk Reduction and Management Office (MDRRMO), dagiti opisial ti barangay ken munisipyo, kasta met dagiti boluntario, tapno maisalakan dagiti biktima.
Gapu iti napardas a panagresponde, naisalakan dagiti dua nga estudiante ken naipan iti ospital para iti pannakaagasda. Ti maikatlo a biktima ket naipakaammo a natay.
Nalpas ti rescue operation iti agarup alas-11:54 ti rabii. Agtultuloy pay laeng ti imbestigasyon ti pulisya tapno maammoan no ania ti nangiturong iti aksidente.
Palagip ti pulisya kadagiti amin a motorista nga agannad iti panagmaneho, agtungpal kadagiti paglintegan iti trapiko, ken kanayon nga agusar iti helmet ken dadduma pay a safety gear. No adda emerhensiya, mabalin a tumawag iti Unified 911 wenno iti asidegen a police station tapno makaawat iti dagus a tulong.
Source: Aguinaldo MPS
