LAOAG CITY – Naarestar ti 11 nga indibidual gapu iti panagsugalda iti maysa a minatayan iti Barangay 6, San Juan Bautista iti ili ti San Nicolas.
Segun ken ni P/Capt. Sygman Benigno, Hepe ti San Nicolas Municipal Police Station, natiliw dagiti 11 nga indibidual nga agpapada dagitoy a residente iti nasao a barangay kalpasan a naaktuaran nga agay-ayamda ti Lucky 9.
Nakumpiskar dagiti otoridad ti maysa a set ti blue playing cards, maysa a black folding table, 10 a blue monoblock chairs, maysa a brown tablecloth, sumagmamano a cellphone ken kuarta nga agbalor ti PhP 108,076.00 iti nagduduma a denominasion.
Naammoan a nairekomendar nga agbayad ti 30 ribu a pisos a piyansa ti tunggal maysa dagiti suspek para iti temporario a pannakawaya-wayada.
Sumango dagiti suspek ti kaso gapu iti panaglabsingda iti Presidential Decree 1602 wenno ti Anti-Illegal Gambling Law.
Source: Bombo Radyo Vigan
