Ipinagdiwang ng Overseas Workers Welfare Administration-Cordillera (OWWA-CAR) ang Araw ng Pamilya ng OFW sa Dr. Efren U. De San Jose Memorial Sports Center, Poblacion East, Flora, Apayao nito lamang ika-13 ng Disyembre 2024.
Mahigit 800 katao ang lumahok sa nasabing aktibidad, kabilang ang mga miyembro ng OFW Family Circles (OFCs) at mga kinatawan mula sa Local Government Unit (LGU) ng iba’t ibang bayan sa Apayao.
Ang lahat ay nakibahagi sa kasiyahan at selebrasyon. Nagdaos ang OWWA-CAR ng iba’t ibang paligsahan at namigay ng mga papremyo sa raffle draw, kung saan ang mga kalahok ay nagkaroon ng pagkakataong makauwi ng appliances, kagamitang pambahay, at cash prizes. Isa sa mga tampok na aktibidad ang “Apayao Got Talent” competition, kung saan ipinamalas ng mga kalahok ang kanilang natatanging talento.
Layunin ng OWWA-CAR na maipadama ang diwa ng Pasko, kilalanin ang sakripisyo at pagsusumikap ng mga OFW sa pamamagitan ng kanilang mga pamilya, at palakasin ang ugnayan sa pagitan ng OFCs, LGU partners, at mga miyembro ng pamilyang OFW mula sa iba’t ibang bayan ng Apayao.
