Nangipalagip ken nangipaay iti dua a bulan nga ultimatum ti Department of the Interior and Local Government (DILG) kadagiti amin a local government units (LGUs) tapno kalusen ken baklasen dagus dagiti nagan, ladawan, ken aniaman a promotional materials dagiti pulitiko nga naipasdek kadagiti proyektong pinondohan ti gobyerno.
Segun kenni DILG Secretary Jonvic Remulla, impaay ti ahensiya ti nasao nga aldaw ta maikonsidera a kasapulan ti innem agingga walo a lawas sakbay a makasurot amin dagiti LGU iti ipapatumpal a “Anti-Epal Policy” ti administrasyon. Daytoy ket tapno maipaay met ti umno a panawen iti panagbaklas kadagiti nadumaduma a lugar.
Impasigurado ni SILG Remulla a dagiti saan a makasurot iti nasao a patakaran ket mabalin a maisardeng iti serbisyo ken mabalin met a makasapul iti administratibo a kaso. Dagiti panaglabsing, segun kenkuana, ket saan laeng a simpleng paglabus ti regulasyon no di ket pananglapastangan iti pondo ti taumbayan.
Idi Enero 21, nagparuar ti DILG iti memorandum order a mangiparit iti aniaman a pulitiko nga agikabil ti bukodna a nagan, ladawan, wenno promotional materials a kas kadagiti billboard, streamer, ken sticker iti aniaman a government project iti entero a pagilian.
Inlawag ni SILG Remulla a dagiti proyekto ti gobyerno ket naggapu iti buwis ti umili ken saan a rumbeng nga aramaten iti personal a panagpabango wenno panagpromosyon dagiti pulitiko. Impaganetgetna pay a masapul a maipakita ti kinatakneng ken integridad iti panagserbi iti publiko.
“A good job sells itself. If you perform well, it sells itself. You don’t need to ‘epal’ [nasayaat nga aramid, isuna met ti mangibenta iti bagina. No nasayaat ti panagserbi, awan ti kasapulan nga ag-‘epal’],” kinunana.
Inpasayaat met ni SILG Remulla dagiti sumagmamano a LGUs a napardas a nakasurot iti kautusan, a kas ehemplo ti nasayaat a panagtungpal iti linteg ken respeto iti taumbayan.
