Naitalged itan a maibaga a ti gambling tycoon a ni Charlie “Atong” Ang ket isu met laeng ti pinadas a mangimpluwensia iti panag-usisa ti National Police Commission (Napolcom) maipanggep iti panagkidnap ken panagpapatay kadagiti sabungero wenno cockfight aficionados. Daytoy ket impaneknek ni Napolcom Vice Chairman ken Executive Officer Rafael Vicente Calinisan.
Segun kenni Calinisan, ni Ang ti tinudtudoenna idi Hulyo 2025 a “sabong boss” a pinadas a mangbaliw wenno mangipangato iti desision iti ongoing a imbestigasion ti Napolcom. Kinunana a dua a persona ti pinadas a mangipasangsangbay iti panag-usisa a mangiraman iti 12 a aktibo a miyembro ti Philippine National Police (PNP), ken maysa kadagitoy ket ni Ang.
Ti sabali a persona, segun kenni Calinisan, ket nairaman iti maysa a local government executive, ngem saan a imparangarang ti identidadna. Inlawlawagna pay a pinadas ni Ang a mangipamagitan iti imbestigasion babaen iti maysa a tao a nasinged kenni Calinisan, kalpasan nga impila ti whistleblower a ni Julie Patidongan iti kaso kontra kadagiti pulis.
Ni Patidongan ket pinasang-atna ni Ang a kas ti utek wenno “mastermind” iti panagpapatay kadagiti sabungero. Segun pay kenni Calinisan, nainsulto isu iti inaramid ni Ang, nga inlawlawagna a kas panagpadas a “gumatang” iti pabor ken umiso a desision a pakinabangan dagiti nasao a pulis.
“Hindi ako kayang bayaran. Justice is not for sale,” kinuna ni Calinisan, a mangipakita iti natibker a posision ti Napolcom a ipatuloy ti imbestigasion a saan a naimpluwensiaan ken agtalinaed iti prinsipio ti kinaimbag ken kinaurnos ti hustisia.
