Isa na namang tagumpay ang ipinagdiriwang ngayon hindi lamang ng rehiyon Cordillera kundi maging ng buong bansa dahil sa pagkapanalo ni Joshua “The Passion” Pacio sa katatapos lamang na One Fight Night 15 na ginanap sa Lumpinee Boxing Stadium sa Bangkok, Thailand nito lamang Oktubre 7, 2023.
Ang 27 anyos na Cordilleran Fighter na tubong La Trinidad, Benguet at Former ONE Strawweight MMA World Champion ay nanalo laban kay Mansur Malachiev ng Russia sa pamamagitan ng unanimous decision.
Hindi naging madali ang pagbabalik ni Pacio sa ONE Championship ring, ngunit hindi rin siya nagpatinag, kung saan matapos ang 15 minuto ay nakumbinsi niya ang tatlong hurado na ibigay sa kanya ang panalo.
Si Pacio na mula sa Lions Nations Gym ang kasalukuyang top-ranked contender matapos niyang iparanas kay Malachiev ang unang pagkatalo.
Si Pacio ay may record na 21 panalo at 4 na talo habang si Malachiev na nasa #5-ranked ay may record naman na 11 panalo at isang talo.
