Patay ang isang menor-de-edad habang isa naman ang nalagay sa kritikal sa nangyaring vehicular accident sa pagitan ng isang van at isang vegetable cargo truck sa Marcos Highway Poblacion, Tuba, Benguet nito lamang ika-6 ng Oktubre 2023.
Ayon sa report, ang van ay mula sa Zambales paakyat sa Baguio City lulan ang walong menor-de-edad at anim pang pasahero habang ang Cargo Truck ay galing sa Baguio City na may lamang mga gulay.
Lumalabas sa inisyal na imbestigasyon ng pulisya na nagkaroon ng mekanikal problem ang 10 wheeler vegetable delivery truck na dahilan upang mawalan ng kontrol ang driver kaya ito ay sumalpok sa kasalubong na van.
Namatay sa hospital ang isang menor-de-edad habang ginagamot ang isa pang nasa kritikal na kalagayan.
Ang lahat ng iba pang biktima sa nasabing aksidente ay nasa mabuting kalagayan pagkatapos ng medical intervention.
Nasa kustodiya na ng Tuba PNP ang driver ng truck habang nagpapatuloy ang isinasagawang imbestigasyon.
