Nag-uumapaw ang kasiyahan ng mga atletang Cagayano matapos tanghaling muli bilang Overall Champion sa katatapos na Cagayan Valley Regional Athletic Association (CAVRAA) Meet 2023 na ginanap sa Ilagan City, Isabela.
Sa closing ceremony na ginanap kahapon, ika-28 ng Abril 2023, bakas ang tuwa sa mukha ng mga atleta, coaches, trainers, opisyal ng School Division Office (SDO) Cagayan at ilang mga magulang ng mga atleta na dumalo.
Pinatunayan ng mga atletang Cagayano ang katagang pinanghahawakan na “Cagayan Agga No. 1 Mamba” ngayong CAVRAA 2023.
Panglimang taon na magkakasunod na naiuwi ng koponan ng Cagayan sa elementary at secondary level ang titulo bilang kampyon sa naturang palakasan.
Dinomina ng SDO Cagayan ang mga kalaban sa pagsungkit ng 105 na gold medals, 98 silver at 101 bronze kung saan nakalikom ang mga atleta ng kabuuang 304 na medalya.
Kaugnay nito, labis ang pasasalamat ng pamunuan ng SDO Cagayan sa pangunguna ni SDS Reynante Z. Caliguiran kay Governor Manuel Mamba sa suporta na kanyang ibinigay sa mga atleta.
Aasahan na isasagawa ang seremonya ng pamamahagi ng insentibo sa mga atletang nag-uwi ng karangalan sa mga susunod na linggo na pangungunahan ng gobernador.
Naglaan ng Php21 milyon ang Provincial Government of Cagayan (PGC) para sa CAVRAA at Palarong Pambansa na lalahukan ng mga atleta.
Source: Cagayan Provincial Information Office
