Patay ang Vice-Mayor ng Aparri, Cagayan kasama ang limang iba pa matapos tambangan at pagbabarilin ng anim na di pa nakikilalang suspek sa National Highway, Kinacao, Baretbet, Bagabag, Nueva Vizcaya nitong Linggo, Pebrero 19, 2023.
Ayon sa ulat na inilabas ng Bagabag Police Station, sakay ng isang kulay itim na Hyundai Starex na may plakang KOV 881 ang mga biktima nang tambangan at pagbabarilin ng anim na suspek na nakasuot ng PNP Pixelized Uniform sakay ng isang puting Mitsubishi Adventure na may plakang SFN 713.
Samantala, naglabas naman ng pahayag ang PNP Region 2 kung saan kinumpirma at binigyan diin ni PBGen Percival A Rumbaoa, Acting Regional Director, na bagamat nakasuot ang mga suspek ng uniporme ng pulis ay hindi sila mga lehitimong miyembro ng PNP.
Bumuo na rin ng Special Investigation Task Group ang Nueva Vizcaya Police Provincial Office na siyang tututok sa imbestigasyon upang masukol ang mga responsable sa karumal-dumal na krimen.
Nanawagan din ang PRO2 sa mga mamamayan na makipagtulungan sa pulisya upang mas mapabilis na mahanap ang mga suspek at malutas ang naganap na pamamaslang.
Source: PRO2 RPIO
