Nauram ti maysa a balay idiay Dominguez Subdivision idiay San Luis Village, Baguio City ita a malem.
Sigun kadagiti otoridad, naiyawag kadakuada ti nasao nga uram pasado alas tres ti malem.
Dagos met a nagturong sadiay dagiti kameng ti Bureau of Fire Protection ken dadduma nga otoridad.
Naideklara nga under control ti nasao nga uram idi 3:50 ti malem ken naideklara ti fire out iti 4:18 ti malem.
Sigun pay kadagiti otoridad, ti nauram ket maysa a balay nga addaan dua a kadsaaran.
Innayon dagitoy nga awan met ti nadangran kadagiti pamilya nga akintagikua iti nasao a pagtaengan.
Nupay kasta, adda dagiti tarakenda nga ayop nga agpapada nga addaan breed a nauram ken pimmusay pakairamanan ti lima nga aso.
Nakalasat met ti tallo pay nga aso ken maysa pay a pusa ti nasarakan a sibibiyag dagiti otoridad.
Uppat pay a taraken nga ayop ti mapukpukaw ken sarsaraken dagiti otoridad.
Amin dagiti nasao nga ayop ket addaan pay iti breed.
Maur-uray pay laeng ti danyos ken rason ti napasamak nga uram.
Source: Bombo Radyo Baguio
