Lima a mannalon idiay Barangay Marozo, Narvacan, Ilocos Sur ti natakawan ken nailako dagiti electric water pump-da.
Ti suspek ket maysa a lalaki nga agtawen iti uppat a pulo ket walo, agnaed iti Barangay San Pablo, Narvacan.
Maysa kadagiti biktima ti nakakita iti Facebook post a mangilaklako iti electric pump ket nalasinna a daytoy ti mapukpukawna.
Dagus a napan ti nasao a biktima iti pagtaengan ti aglaklako tapno kumpirmaran ti pump, ngem nalakon.
Idi nagtitipon dagiti dadduma pay a mannalon a napukawan met laeng iti water pump, inreport-da ti pasamak iti kapitan ti barangay, ket naammuanda a maymaysa a suspek ti mapapati a nangala ken nangilako.
Boluntaryo met nga insuko dagiti buyer iti Narvacan MPS ti water pump a nagatangda.
Isagsaganan ti kapulisan dagiti kasapulan a dokumento para ti pannakaipila ti kaso a theft kontra iti suspek.
Source: Bombo Radyo Vigan
