Matatagpuan ang naturang ganda ng Lower Magat Eco-Tourism park sa Munisipalidad ng Diadi, Hilaga ng Nueva Vizcaya, na napapaligiran ng mga lalawigan ng Isabela at Ifugao at sa ibaba nito ay ang malamig at malinis na Ilog magat ng Cagayan Valley.
Ang Lower Magat Eco-Tourism Park ay may lawak na 1120 ektaryang lupain kung kaya’t marami ang pwedeng matuklasan tulad na lamang ng mga matatayog na mga Puno ng Mahogany at marami pang iba na siyang pumoprotekta sa bulubundukin ng Diadi, at kalapit na Munisipalidad.
Nakuha sa pamahalaang panlalawigan ang lupaing ito mula sa DENR noong 1969 upang mapanatili at mapaunlad ang lugar na ito bilang isang high-end na back-to-nature park. Taong 2005 noong nagsimulang umunlad at gumanda ang naturang Eco-park.
Sa ngayon ay mayroon nang lodging facility sa lugar para sa mga Bisita at Turistang gustong manatili at madama ang ganda ng lugar. Nariyan ang Yakal Hall na gusali na may maluluwag at kumportableng mga silid, pwede ring manatili at maranasan sa mga tradisyonal na kubo ng mga Ifugao na matatagpuan sa isang burol na napapaligiran ng mga puno.
Dito rin matatagpuan ang isa sa mga dinadayo nila, ang napakatahimik na Lawa na kung saan may mga katutubong kubo sa gilid na maaaring manatili ang mga bisita nang magdamag sa paligid nito ay ang mga naggagandahang klase ng bulaklak na siyang nagbibigay kulay sa paligid.
Ang lugar na ito ay talagang dinarayo dahil sa taglay na ganda at luntiang paligid nito mula sa mga huni ng ibon na iyong maririnig, meron ding Hiking trail para sa mga gustong tuklasin ang mga kalapit na burol. Mainam din ang mountain biking dahil meron na itong maganda at sementadong daanan.
Bukod dito ay may mga camping ground din sa mismong lugar para sa mga bisita na gustong manatili, ito’y mainam para sa mga talagang nature escapes o outdoor enthusiast katulad na lamang ng Lower Magat Eco-Tourism Park.
Sa panunulat ni Emmat
