Pormal na binuksan ng Kagawaran ng Kagalingan at Pagpapaunlad Panlipunan Rehiyon Dos (DSWD FO2) ang bagong Social Welfare and Development (SWAD) Satellite Office sa Cabaruan, Cauayan City, Isabela noong ika-22 ng Abril 2024.
Ang pagtatayo ng SWAD Satellite Office sa lungsod ay pinangunahan ng DSWD Field Office katuwang ang lokal na Pamahalaan ng Cauayan City mula sa inisyatibo ni House Representative-6th District of Isabela Faustino “Inno” A. Dy.
Ang seremonya ay pinangunahan naman nina DSWD FO2 Regional Director Lucia Suyu-Alan, House Representative Inno Dy, City Mayor Caesar “Jaycee” Dy Jr., at Vice Mayor Leoncio A. Dalin, Jr., ang ceremonial blessing na nagmamarka ng opisyal na pagbubukas ng bagong SWAD Satellite Office sa lungsod.
Kasama rin sa seremonya ang Municipal Social Welfare and Development Officer ng Cauayan City, Local Government Unit ng Cauayan, at mga kawani ng DSWD.
Sa nasabing satellite office, inaasahang magiging mas abot-kamay ng mga mamamayan ang mga serbisyong pangkaunlaran tulad ng pagbibigay ng Assistance to Individuals in Crisis Situations o AICS, livelihood programs, counseling services, at iba pang tulong na maaaring magbigay ng bagong pag-asa at oportunidad.
Patuloy ang DSWD Field Office 02 sa pagpapatupad ng mga proyektong nakatuon sa pag-angat ng antas sa pamumuhay ng mga Pinoy, lalo na sa mga lugar na nangangailangan ng agarang tulong at suporta tungo sa tunay na pagbabago at kaunlaran para sa lahat.
Source: DSWD R02
